Lhe Droe Ureung Yang Neupeureului le Tuhan Uroe Dudoe di Miyup Arasy
Pertama raja yang ade perintah
Hana amarah laklem angkara
Geumat neraca ngon ridha Allah
Bukon geureupah peugot kudeta
Ngon leumah leumbot rakyat geupapah
Zakeut ngon fitrah bulum beurata
Hak ureung gasin hana geureupah
Rakyat yang leumoh mandum geubila
Maksit ngon laknat mandum geuteugah
Barang yang salah hanjeut keu benar
Hana teukabo teulanjo peugah
Geumat perintah ngon bijaksana
Uroe akhirat rahmat bak Allah
Dimiyup Arasy peureului ulee
Di ureung laen dum apoeh apah
Raja meutuah Tuhan peusilee
Keudua insane muezzin yang bang
Geuhoi sembahyang oh katroeh wate
Umat geupanggil pagi ngon peutang
Mari sembahyang waya hai sampee
Bukon karena ria teukabo
Geupeuleumah su yang jroeh meualon
Geuharap pahala geumita syukor
Hana teukabo gob sanjong-sanjong
Teuma yang keulhee meugteume untong
Tuhan peulindong dipadang mahsya
Meuteume rahmat di miyup paying
Lam uroe tutong Tuhan peulara
Soe yang tem baca Qur’an suci
Seureutoh kali afai lam dada
Uroe ngon malam rindu keu Rabbi
Cinta sejati wahyu Rabbana
Bacaan khusyuk geuduk bak sunyi
Ingat keu Rabbi hantom na reuda
Bukon karena geuharap gaji
Peuleumah ahli bak sayembara
Baca Qur’an karena Allah
Hana meusiblah harap keu donya
Meunyo lage nyan meuhat meutuah
Rahmat meulimpah dipadang mahsya
Beujroh neuingat sahbat dum saree
Geutanyo matee oh katroeh masa
Masa didonya neumita wasee
Keupangkai page di yaumil mahsya
Bandum geutanyo beu ek meusapat
Meuteume rahmat karonya Rabbi
Ngon tulong Nabi panghule umat
Neubi syufa’at Liwaul hamdi